ഒരു മഴ കൂടി പെയ്തൊഴിയുന്നൂ സഖി
കൊടും വേനലിൻ തപം പേറുന്ന മണ്ണിൽ
നനഞ്ഞ ജാലകപ്പടി തേടുന്നു നിന്റെ
കൊഴിഞ്ഞ കിനാക്കളും നോവാർന്ന സ്വപ്നങ്ങളും
ഒരു മഴ കൂടി പെയ്തൊഴിയുന്നൂ സഖി
നോവുറഞ്ഞു വിളർത്ത നിന്റെ മിഴികളിൽ..
പാതി വിരിഞ്ഞു കൊഴിഞ്ഞൊരാ പുഞ്ചിരി തന്നുടെ
അരികു പറ്റി നിരന്നു നിൽപ്പതുണ്ടകം വിങ്ങുന്ന നോവുകൾ
ഒരു മഴ കൂടി പെയ്തൊഴിയുന്നൂ സഖി
നിന്റെ വരളുന്ന ഹൃദയത്തിനകത്തളങ്ങളിൽ
മുന കൂർത്ത വാക്കിനാൽ മുറിവേറ്റു പിടയുന്ന
പാതി മരിച്ചൊരാ മനസിന്റെ മാറിലും
ചതിയായ് വന്നു പുൽകിയൊരാ പ്രണയം
പകർന്നേകിയ വിഷം കറുത്ത വീഞ്ഞിനാൽ
കറവീണുലഞ്ഞ നിൻ സ്നേഹം വിളർത്തയാകാശങ്ങളിലും
ഒരു മഴ കൂടി പെയ്തൊഴിയുന്നൂ സഖി
വീണ്ടുമീ കവിത മരിച്ചയെന്റെ തൂലികത്തുമ്പിലും..
നിന്റെ ഓർമക്കായ് കവർന്നെടുത്തു കാത്തിടാൻ
ഒരു കുഞ്ഞു തുള്ളിപോലുമെൻ കൈയിലേക്കിറ്റിക്കാതെ..
പെയ്തു പെയ്തങ്ങൊഴിയുന്നു വർഷവും
പെയ്തൊഴിയാതെ പെയ്യുന്നു നീയും
ഒരു മഴ കൂടി പെയ്തൊഴിയുന്നൂ സഖി
പൊയ്തൊഴിയുന്നു നിന്റെ
പ്രാണനെക്കൂടി പകുത്തെടുത്തിടുന്നു..
No comments:
Post a Comment