ഗുൽമോഹർ

ഇരുളു നിറഞ്ഞ ഇടവഴികളിലെവിടെയോ

അടർന്നു വീണു കിടപ്പുണ്ട്

നഷ്ട പ്രണയത്തിന്റെ കനലു പേറുന്ന

കണ്ണീരിൽ കുതിർന്ന എന്റെ സ്വപ്നങ്ങൾ..

എല്ലാം പറഞ്ഞു തീർത്തു നീ

പിൻ തിരിഞ്ഞ് നടക്കവേയാണ്

എന്റെ കണ്ണുകളിൽ നിന്നടർന്ന്

അതവിടെ വീണു പോയത്..

എന്റെ പിൻവിളി കേൾക്കാതിരിക്കാനെന്നോണ-

മധിവേഗം നടന്നതിനാലല്ല..,

ഒരിതൾ പൊഴിയുന്നതു പോലെ

തീർത്തും നിശബ്ദമായാണതവിടെ

വീണതെന്നതിനാലാണ്

അവ വീണുടഞ്ഞ ശബ്ദം നീ

കേൾക്കാതിരുന്നതെന്ന് വിശ്വസിക്കുന്നു ഞാൻ..

അങ്ങനെയല്ലെന്ന് എന്റെയാത്മാവ്

തർക്കിക്കുന്നുവെങ്കിലും

അങ്ങനെയാവട്ടെയെന്നാശ്വസിക്കാനാണ്

വിടരാൻ മറന്ന മൊട്ടുകളുള്ള

ഇടവഴിയിലെയാ ഗുൽമോഹറും പറഞ്ഞത്..